«Հ. Մ.-ն նախօրոք տեղյակ է եղել, որ Թուրքիայում պետք է մարմնավաճառությամբ զբաղվի». պաշտպան

20.05.2013
Երեկ ՀՀ վերաքննիչ քրեական և զինվորական դատարանում տեղի ունեցավ ամբաստանյալներ Սուսաննա Մարտիրոսյանի և Նարինե Մովսիսյանի գործով` Շիրակի մարզի ընդհանուր իրավասության առաջին ատյանի դատարանի կողմից 2013 թվականի փետրվարի 27-ին կայացված դատավճռի դեմ դատական նիստը:
Գործը լսում էին նախագահող դատավոր Գ. Մելիք-Սարգսյանը, դատավորներ Հ. Տեր-Ադամյանը և Կ. Ղազարյանը:

Նիստին ներկայացել էին մեղադրող Վ. Հովհաննիսյանը, ամբաստանյալ Նարինե Մովսիսյանը, պաշտպաններ Գ. Շիրինյանը, Մ. Մուրադյանը:
Նիստին չէր ներկայացել ամբաստանյալ Սուսաննա Մարտիրոսյանը: Վերջինս նիստից առաջ իրեն վատ էր զգացել, շտապօգնություն էին կանչել և ներարկում կատարել: Ամբաստանյալը հայտնել էր, որ նիստը կարող են սկսել առանց իրեն և ասել էր, որ իր պաշտպան Գ. Շիրինյանը կներկայացնի իր բողոքը:

Նիստի նախագահող դատավոր Գ. Մելիք-Սարգսյանը բոլորին հիշեցրեց, որ նախորդ երեք նիստերը կրկին հետաձգվել են Ս. Մարտիրոսյանի միջնորդությունների պատճառով:
Շիրակի մարզի ընդհանուր իրավասության առաջին ատյանի դատարանի կողմից 2013 թվականի փետրվարի 27-ին կայացված դատավճռի դեմ վերաքննիչ բողոքն այս անգամ ներկայացրեց միայն ամբաստանյալ Նարինե Մովսիսյանի պաշտպան Մ. Մուրադյանը:

«Ն. Մովսիսյանն իրեն առաջադրված մեղադրանքում իրեն մեղավոր չի ճանաչել և ցուցմունք է տվել այն մասին, որ ինքը զբաղվել է մարմնավաճառությամբ և Ս. Մարտիրոսյանից հաճախակի ապառիկ գնումներ է կատարել: 2010թվ-ին իրեն արտաքսել են Թուրքիայից, մեկ տարի հետո նա կրկին ցանկացել է մեկնել այնտեղ` իր հին աշխատանքով զբաղվելու համար: 2011թ-ի ամռանը իր ծանոթներից մեկը, ում ևս արտաքսել են Թուրքիայից, հայտնել է, որ իր ծանոթներից` Հ. Մ-ը ցանկանում է մեկնել Թուրքիա` մարմնավաճառությամբ զբաղվելու համար և խնդրել է Նարինեին օգնել Թուրքիա մեկնելու գործում: Նարինեն Հ-ին պատմել է, թե ինչպես է տեղի ունենում այդ գործընթացը, վերջինս հայտնել է, որ այդ աշխատանքին նա ծանոթ է, քանի որ եղել Արաբական Միացյալ Էմիրություններում և Ուզբեկստանում: Հ-ի Նարինեին խնդրել է, որ իր մորն ասի, որ միասին գնում են Թուրքիա մարդ խնամելու համար: Վերջինս Հ-ի խնդրանքը չի մերժել: 2011-ի օգոստոսին նրանք մեկնել են Թուրքիա, նախօրոք Նարինեն տեղեկացրել է Սուսաննային իրենց գալու մասին: Հասնելով Թուրքիա` Սուսաննան դիմավորել է նրանց, և Հ-ը նրա մոտից ապառիկ գնումներ է կատարել: Հ-ն ի սկզբանե տեղյակ է եղել իր պարտքի մասին: Նարինեն զգուշացրել է, որ Սուսաննայի մոտ գտնվող ապրանքները համեմատաբար թանկ են և առաջարկել է քիչ գնումներ կատարել: Մարմնավաճառությամբ զբաղվելու համար նրանք տեղափոխվել են «Իշիկ» հյուրանոց, իսկ չորս օր անց արդեն բնակարան են վարձել նույն շենքում, որտեղ բնակվում է Սուսաննան: Այստեղ Հ-ը ծանոթացել է Վ. Ս-ի հետ և կազմել իրենց հետագա անելիքները: Տասը օր հետո Հ-ը վարձել է մի նոր բնակարան, Վ-ի հետ տեղափոխվել այնտեղ, միաժամանակ մարմնավաճառությամբ զբաղվելով «Իշիկ» հյուրանոցում: Այս ընթացքում Հ-ը մտերմացել է հյուրանոցի տնօրեն Յակոբի հետ: Այս ընթացքում Հ-ը պարբերաբար գնումներ է կատարել Սուսաննայի մոտից, իսկ ժամանակ առ ժամանակ մաս-մաս պարտքն է մարել: Երբ Նարինեն իմացել է Հ-ի պարտքերի մասին, առաջարկել է նրան գնված ապրանքները ետ վերադարձնել, բայց վերջինս ասել է, որ դրանք Հայաստան է ուղարկել: Հ-ի անձնագիրն իր մոտ է եղել, և նա չորս անգամ ելք ու մուտք է արել: Նա է տնօրինել մարմնավաճառության ընթացքում ստացած գումարը»,-ասաց Մ. Մուրադյանը:
Վերջինս կարծում է, որ Շիրակի մարզի ընդհանուր իրավասության առաջին ատյանի դատարանի կողմից 2013 թվականի փետրվարի 27-ին կայացված դատավճիռն օրինական ու հիմնավորված չէ, ուստի Ն. Մովսիսյանի նկատմամբ կայացված դատական վճիռը ենթակա է ամբողջական բեկանման:

Հիշեցնենք, որ ըստ Շիրակի մարզի ընդհանուր իրավասության առաջին ատյանի դատարանի կողմից 2013 թվականի փետրվարի 27-ին կայացված դատավճռի` ամբաստանյալներ Սուսաննա Մարտիրոսյանը և Նարինե Մովսիսյանը, նախնական հանցավոր համաձայնությամբ, 2011թ-ի օգոստոս ամսին Հ. Մ-ի՝ Թուրքիայում որպես խնամակալ աշխատելու առաջարկը օգտագործելով որպես շահագործման նպատակով նրան Թուրքիա տեղափոխելու լավ պատրվակ, խաբեությամբ՝ Թուրքիայի Կոնյա քաղաքում խնամակալի աշխատանքով ապահովելու և ամսական 700-800 ԱՄՆ դոլար գումար վաստակելու խոսքերով հավատ ներշնչելու միջոցով՝ նրան Թուրքիա տեղափոխելու իրական նպատակը գիտակցաբար թաքցնելով և իրականությունը խեղաթյուրելով՝ Հ.Մ-ին հավաքագրել են և ՀՀ պետական սահմանը հատելու միջոցով կազմակերպել նրա տեղափոխումը Թուրքիայի Տրապիզոն քաղաք: Տրապիզոնում Ն.Մովսիսյանը սեռական շահագործման նպատակով Հ.Մ-ին հանձնել է Ս.Մարտիրոսյանին, վերջինս էլ Հ.Մ-ի վիճակի խոցելիությունն՝ սոցիալապես ծանր վիճակում գտնվելու, լեզվին չտիրապետելու և քաղաքին անծանոթ լինելու փաստը օգտագործելով, կեղծ մարդասիրությամբ անհամեմատ թանկ գներով, հետագայում դրանց դիմաց մաս-մաս վճարելու պայմանով, Հ.Մ-ին հագուստներ վաճառելով և դրանց դիմաց պարտք մնացած գումարը մարելու պահանջով հարկադրել է զբաղվել մարմնավաճառությամբ՝ Հ.Մ-ին տեղավորելով «Իշիկ» հյուրանոցում: Շուրջ չորս ամիս Հ.Մ-ի՝ իրեն ունեցած պարտքը մարելու պահանջով և նրա Թուրքիայում մարմնավաճառությամբ զբաղվելու մասին մորը տեղեկացնելու սպառնալիքով՝ Ս.Մարտիրոսյանը սեռական շահագործման է ենթարկել Հ.Մ-ին և նրանից վերցրել մարմնավաճառությամբ վաստակած շուրջ 7500 ԱՄՆ դոլար գումարը:
Ս.Մարտիրոսյանին և Ն.Մովսիսյանին առաջադրված մեղադրանքը ճիշտ է որակված ՀՀ քրեական օրենսգրքի 132 հոդվածի 2-րդ մասի 2-րդ եւ 6-րդ կետերով, որով և նրանք ենթակա են քրեական պատասխանատվության և պատժի:

Պատիժ նշանակելիս դատարանը հաշվի է առել կատարված հանցագործության հանրության համար վտանգավորության աստիճանը և բնույթը, ամբաստանյալների քրեական պատասխանատվությունը և պատիժը մեղմացնող հանգամանքներ համարելով նախկինում արատավորված չլինելը, Ս.Մարտիրոսյանի բնակության վայրից դրական բնութագրվելը, անառողջ վիճակը, Ն.Մովսիսյանի խնամքին մինչեւ տասնչորս տարեկան երեխայի առկայությունը:
Ծանրացնող հանգամանքներ չկան:

Դատարանը, քննարկելով ամբաստանյալների նկատմամբ ՀՀ քրեական օրենսգրքի 132 հոդվածի 2-րդ մասի սանկցիայով նախատեսված լրացուցիչ պատիժների կիրառման հարցը, գտել է, որ ելնելով ամբաստանյալների նյութական վիճակից, նաև այն հանգամանքից, որ հանցանքը կատարելիս նրանք որևէ պաշտոն չեն զբաղեցրել՝ գտնում է, որ լրացուցիչ պատիժների կիրառումը նպատակահարման չէ:

Դատարանը վճռել էր` Ս. Մարտիրոսյանին հանցավոր ճանաչել ՀՀ քրեական օրենսգրքի 132 հոդվածի 2-րդ մասի 2-րդ և 6-րդ կետերով և դատապարտել ազատազրկման 8/ութ/ տարի ժամկետով՝ առանց գույքի բռնագրավման և առանց որոշակի պաշտոններ զբաղեցնելու իրավունքից զրկման, որը կրելու է ՀՀ ԱՆ համապատասխան քրեակատարողական հիմնարկում:
Իսկ Ն. Մովսիսյանին հանցավոր ճանաչել ՀՀ քրեական օրենսգրքի 132 հոդվածի 2-րդ մասի 2-րդ և 6-րդ կետերով և դատապարտել ազատազրկման 7/յոթ/ տարի ժամկետով՝ առանց գույքի բռնագրավման և առանց որոշակի պաշտոններ զբաղեցնելու իրավունքից զրկման, որը կրելու է ՀՀ ԱՆ համապատասխան քրեակատարողական հիմնարկում:

Դատարանը որոշեց նիստը հետաձգել, որպեսզի լսի նաև ամբաստանյալ Ս. Մարտիրոսյանի պաշտպանին:
Նիստը տեղի կունենա այսօր:

Գոհար Արամյան
"Աուդիո-Վիզուալ լրագրողների ասոցիացիա" ՀԿ
Հայաստանում թրաֆիքինգի դեմ պայքարի հատուկ ծրագրեր
«Հայաստանում թրաֆիքինգի դեմ պայքարի տեղեկատվական պլատֆորմի զարգացում"